Dit vergète nooit mèr, ’t is einmalig, dit mâkte nooit mèr mit, dit is ’t mojste jaor van òw lèè.ve en zo hebbe we nog wel tien of twintig wanlainers, uutspra.ke en kliesjees öm op te noeme. Ik mòt eerluk zegge, dâk vörrig jaor nog nie zóveul mit die uutspra.ke haj. Mar afgelo.pe jaor zien al deez kliesjees meer dan èèns gezèt tigge o.ns. En nów an ’t èènd van ons Prinsejaor begint ’t allemaol ien te da.le. Alle kliesjees zien allemaol waor. En we di.nke dat wïj dit jaor ‘t zelfde tigge ’t nïje Prinsepaar gaon zegge.
Wïj as èchte vastelaovesvierders hebbe geweldig geno.te van alles wat op o.ns pad kwam ’t afgelo.pe jaor. We hadden o.ns altied al zo vörgeste.ld dat de resepsie unne zwaore aovend is vör de Prins en Prinses. Un par uur boa.ve op ’t podium ien die wèrme la.mpe dan ziede ’s aoves wel gaor dochte wïj. Mar niks is minder waor. Zûnne aovend vlie.gt vörbïj en binne un roef van tied staode o.nder op de tôffel te da.nse.
De wèèk vör de vastelaovend zien we al druk ien de wéér gewèst mit van allerlei bezuukskes an mi.nse die we ekkes ien ’t zûnneke wón zette. Vanaf donderdags komde ien unne roes tere.cht en wètte af en toe nie mèr wat vör unne dag dat ’t is. Zaoterdags op de mèrt is e.cht un fantastisch moj moment um mit te ma. ke. heel Gennep en ömstreke staon feest te viere. En daor meugde as Prins en Prinses ekkes ’t podium op um ’t allemaol ’s van die ka.nt te bekie. ke. De optocht op zondag en de daage daornao ware un belèvenis en vör dagge ’t wèt staode op dinsdag baove op ’t biljart te da.nse en dan is ’t alwèr vörbïj.We ha.lde mekaor nog ekkes va.st as de pop nog bra.nd en dan gaon we zonder stéék op naor huus.
Op woensdag hebbe we de sleutel van ons moje stètje wèr ien motte lé.vere bij d’n burgemèèster en ’s aoves, mit ’t assekruuske nog veur op de kop, nog ekkes naborrele en hèrringschelle mit ’t Bombakkes.
De grötse vergissing die wïj gemâkt hebbe is um te di.nke dat d’r nao aswoensdag niks mèr te doe.n is vör ‘t Prinsepaar. We hebbe gebarbekjoed mit ’t team. We hebbe uutstapjes gehad mit de vriende van ’t Vlie.gend Hert die ze o.ns cadeau gedaon hân mit de resepsie. We hebbe mit de A.lde Garde unne moje dag gehad op 4 mei en we zien toen ôk nog ekkes twee minute stil gewèst zöas da heurt. We zien mit Bombakkes unne moje dag weggewèst. Daor hebbe ze kennis kunne ma.ke mit o.ns hobbies en wè.rk. Leuke excursie gehad bïj Janssen/ Pers. Gelunsjt tusse de maïs letterluk op de gre.ns van Pruuse en ’t Gennepsela.nd. Gètjes gebao.rd ien de praktijk van de Prinses. De neuze allemaol de eggeste ka.nt op gezet. Gegè.te bïj Jong Nederland mit unne geweldige afsluuter. En dat allemaol ien ’t kader van Le Tour de Spiek.
As gillie dit lèèst dan stèt d’r alwèr unne nïje kop op de vörka.nt van deez prachtige kra.nt. Unne kra.nt die gemàkt wördt dör vastelaovesvierders vör vastelaovesvierders. Bombakkes regelt alleen de algemene zake ro.ndöm de kra.nt de rest wördt gedaon dör Compaenen. We mögge haope dat dit un vörbeeld is vör iedereen hoe de vastelaovend ienvulling mot krie.ge de kòmmende jaore. Wíj dóchte ’t Ging nönd aover stèt hier ien de titel van dit stukske. En zo hebbe we da altied geveuld. De vastelaovend mög nönd aover gaon. Serieus zien we ’t hele jaor al en een pàr daag ien ’t jaor duun we gek en zien we nie ons èège.
Lètst hebbe we geleerd waor de vastelaovend eigeluk aover gèt. En ’t gèt hieraover: We griepe vör ekkes de macht. De rolle zien dan ömgedrääid. Ha.ld òw èège unne spie.gel vör, mar ha.ld ôk a.ndere unne spiegel vör. Dat is waor de vastelaovend aover gèt. De vastelaovend is nameluk nie niks. Ien Gennep belèève we de vastelaovend mojer as nooit tevörre. As échte vastelaovendvierder komde ien Gennep méér dan ooit àn òw trèkke. Dit hèt te maa.ke mit de uutzonderlukke verdienste van onze carnavalsclups, ’t Bombakkes, Coloradokèvers en de Waggelaars. Màr ’t môt o.ns van ’t hart dat dat o.ns as vastelaovendvierder een bietje lööj màkt. We hange gèr a. chteraover en kie.ke wat de carnavalsclups nòw wèr hebbe verzonne um vervolleges, as ’t o.ns ànstöt, d’r bïj an te sluute. Wïj viende dat ’t daor nie vanaf môt hange. “De vastelaovend ma.ke we mit zien alle, sa.me laote we ’t krölle en knalle”, was, is en blieft o.ns motto.
Hier zien we dan: un gewoon mèèdje uut de Loj en unne gewone jong uut Gennep-Oost. Wïj waa.re diep vereerd mit de benoeming tot Prins en Prinses carnaval 2014. We hebbe d’r van gemàkt wat binne o.nze mögelijkhede lag en ’t afschejd duut niet e.cht pien. ’T Afschejd was al un jaor vantevörre geplénd en zo heurt ’t ôk. Baove op de högste treede van de vastelaovend, mar nie langer as un heel jaor, daornao kömt d’r unne nïje. En zo môt ’t zien! ‘T is moj gewèst. Bedankt iedereen en allemaol, ’t was meer dan geweldig.
Duut Hin!
Ex-Prins Geert I en Ex-Prinses Lilian